श्री संत रघुनाथ बाबा संजीवनी समाधी सोहळा गुणाट येथे भक्तिमय वातावरणात संपन्न
शिरूर प्रतिनिधी
गुणाट (ता. शिरूर) येथे श्री संत रघुनाथ बाबा यांच्या संजीवनी समाधी सोहळ्यानिमित्त आयोजित करण्यात आलेला दिड दिवसीय धार्मिक कार्यक्रम मोठ्या भक्तिभावाने आणि उत्साहात संपन्न झाला. या वर्षी हा सोहळा २१ व्या वर्षात पदार्पण करत असून परिसरातील भाविकांनी मोठ्या संख्येने उपस्थित राहून दर्शन व कार्यक्रमांचा लाभ घेतला.
या सोहळ्याची सुरुवात मंगळवार दिनांक ४ मार्च रोजी झाली. दिड दिवस चाललेल्या या कार्यक्रमामध्ये विविध धार्मिक उपक्रम, भजन-कीर्तन तसेच भाविकांसाठी आध्यात्मिक कार्यक्रमांचे आयोजन करण्यात आले होते. या काळात मंदिर परिसरात भक्तिमय वातावरण निर्माण झाले होते.
सोहळ्याच्या निमित्ताने अहिल्यानगरचे भूषण म्हणून ओळखले जाणारे कीर्तनकार ह.भ.प. शरद महाराज देशमुख (काळे), कर्जत यांच्या काल्याचे कीर्तन आयोजित करण्यात आले होते. त्यांच्या प्रभावी कीर्तनातून संत परंपरा, भक्ती, संस्कार आणि समाजातील नैतिक मूल्ये यांचा संदेश देण्यात आला. उपस्थित भाविकांनी कीर्तनाचा मनापासून आनंद घेतला.
गुरुवार दिनांक ५ मार्च रोजी काल्याच्या महाप्रसादाचे आयोजन करण्यात आले होते. मोठ्या संख्येने भाविकांनी महाप्रसादाचा लाभ घेतला. काल्याच्या महाप्रसादाने या संजीवनी समाधी सोहळ्याची सांगता करण्यात आली.
या संपूर्ण कार्यक्रमासाठी गावातील ग्रामस्थ, भक्तगण तसेच मंदिर समितीच्या पदाधिकाऱ्यांनी परिश्रम घेतले. भाविकांच्या उत्स्फूर्त प्रतिसादामुळे यंदाचा सोहळा भक्तिमय आणि उत्साहपूर्ण वातावरणात पार पडल्याचे आयोजकांनी सांगितले.
